Асгер къуллукъну кютме сюегенлени санаву арта
Ноябр айны биринден тутуп, декабрни 31-не ерли яшланы гюзгю асгер къуллукъгъа чакъырыв юрюлюп тура. Бу йылны гюзюнде оьтгерилеген асгерге чакъырыв компания бир айгъа артгъа теберилген. Ону да себеби оьтген айларда Украинада юрюлеген хас операциягъа байлавлу мобилизация булан асгер комиссариатланы ишини къыставуллугъ булан байлавлу.
РД-ни Къызылюрт шагьаргъа, Къызылюрт ва Хумторкъали муниципал районлагъа къарайгъан военный комиссариатында асгерге чакъырывгъа гёнгюллю кюйде чакъырылагъанланы санаву артса тюгюл кемимей. Инг башлап оьр охув ожакъланы, техникумланы битдиргенлеге, сонг да яхшы савлугъу булангъылагъа агьамият бериле.
Муна, артагъы гюнлерде республиканы янында Магьачкъалада ерлешген асгерге чакъырыв пунктуна жагьил адамлар бакъдырылды.
Военный комиссар Шейхсайит Магьамматов бизин дагъыстанлылар намуслу кюйде къуллугъун кютегенин эсгерди, бизден асгер къуллукъгъа баргъанлар оьзлени асгер пагьмуларын гёрсетегенин, алдына салынгъан борчланы оьр даражада кютегенин, бары да якъдан оьзлени англавларын, гьазирлигин мисаллар гелтирип айтды. Башгъа регионлар булан урушдургъанда, бизин яшёрюмлерибизни къаркъарасыны гючю, къуваты, къатты хасияты айрыча ер тута демеге ярай.
Шейхсайит оьзюню сёйлевюн узата туруп: "Сиз Дагъыстандан чыкъгъаныгъызны унутмагъыз. Сиз оьзюгюзню тутагъан кююгюзден, борчларыгъызгъа янашывугъуздан кёп зат гьасил болажакъ, сизин гиччи ватаныгъызны сюювге янашагъан кююгюзге де да багьа берилежек",- деди.
Асгер къуллукъгъа чакъырылагъанланы арасында Къызылюрт районну Солтан-Янгыюртундан Даниял Бекеев де бар. Бу ерде Хумторкъали райондан чакъырылагъан жагьиллени атларын да эсгермекни тийишли гёремен. Мисал учун, асгерге чакъырыв компанияны сыдраларына Роман Омаров, Жанболат Мусаев, Рамазан Будайчиев, Тимур Бамматов, Абдурашид Абдуллаев, Батыр Абзагьиров ва Камил Исмаилов (барысы да Къоркъмаскъала юртдан), сонг да Тёбе посёлокдан Атав Акъаев, Абдуллатип Арсланалиев, Учгент юртдан Камил Гьажиев ва Абдулла Омаров Гьажидада юртдан къошулду.
Олагъа асгер къуллукъун кютювде уьстюнлюклер ёрай туруп, эсен-аман сав-саламат кюйде ёлукъмакъны ёрайбыз.
Алибек Салаватов
